ரூ.50 லட்சத்துடன் தலைமறைவான தனியார் கல்லூரி பேராசிரியர் கைது

சேலம் அருகே உள்ள நரசோதிப்பட்டியை சேர்ந்தவர் மனோஜ்குமார். தனியார் என்ஜினீயரிங் கல்லூரி தலைவரான இவர் சூரமங்கலம் போலீஸ் நிலையத்தில் புகார் கொடுத்தார். அதில், எங்களது கல்லூரியில் அஸ்தம்பட்டி பகுதியை சேர்ந்த பேராசிரியர் பார்த்தசாரதி (வயது 44) என்பவர் பணியாற்றி வந்தார். அவரிடம் கடந்த மாதம் கல்லூரி பராமரிப்பு பணிக்காக ரூ.50 லட்சத்தை கொடுத்து முதல்வரிடம் ஒப்படைக்கும்படி கூறினேன். ஆனால் அவர் அந்த பணத்தை முதல்வரிடம் கொடுக்காமல் திடீரென தலைமறைவாகி விட்டார். எனவே பணம் கையாடல் செய்த பேராசிரியர் பார்த்தசாரதியை கைது செய்து பணத்தை மீட்டு தர வேண்டும் என்று கூறி இருந்தார். அதன்பேரில் போலீசார் வழக்குப்பதிவு செய்து விசாரணை நடத்தினர். மேலும் அவரை பிடிக்க தனிப்படை அமைக்கப்பட்டது. அவர்கள் விசாரணை நடத்தியதில் பார்த்தசாரதி குஜராத் மாநிலத்துக்கு சென்றிருப்பது தெரியவந்தது. இதையடுத்து தனிப்படை போலீசார் அங்கு விரைந்து சென்று பேராசிரியரை கைது செய்து சேலம் அழைத்து வந்து விசாரணை நடத்தி வருகின்றனர். மேலும் அவரிடமிருந்து ரூ.17 லட்சம் மீட்கப்பட்டது.