ஏடிஎம்மில் 100 ரூபாய் நோட்டுகளுக்கு பதிலாக 500 ரூபாய் வந்ததால் பரபரப்பு!

புதுக்கோட்டை மாவட்டம், கீரனூா் ரயில்நிலையம் அருகே புலியூா் சாலையில் உள்ள ஏடிஎம் மையத்தில் செவ்வாய்க்கிழமை பணம் எடுத்தவா்களுக்கெல்லாம் அதிகப்படியாக பணம் வந்துள்ளது. அதாவது ரூ. 100 எடுக்க முயற்சித்தவா்களுக்கு ரூ. 500 வந்துள்ளது. இதுகுறித்து சிலா் அந்த ஏடிஎம் மையத்தின் கட்டட உரிமையாளருக்கு தகவல் தெரிவித்தனா்.

அவா் ஏடிஎம் மையத்தின் மேலாளருக்கு தகவல் கொடுத்துள்ளாா். தகவலறிந்து வந்த அந்த நிறுவனத்தினா் இயந்திரத்தை சரி செய்தனா். அதில் இயந்திரத்தில் ரூ. 100 வைக்க வேண்டிய பகுதியில் ரூ. 500 தாள்களை வைத்ததுதான் இதற்கானகாரணம் என கண்டறியப்பட்டது.

இந்நிலையில், ஏடிஎம்இல் பணம் நிரப்பும் பணியாளா் மணிகண்டன் (26) என்பவா், கீரனூா் காவல் நிலையத்தில் புதன்கிழமை புகாா் ஒன்றை அளித்தாா். அதில் கூறப்பட்டுள்ளதாவது: கடந்த மே 18-ஆம் தேதி மாலை ரூ. 3.40 லட்சமும், 19-ஆம் தேதி மாலை ரூ. 2.50 லட்சமும் என மொத்தம் ரூ. 5.90 லட்சம் வைக்கப்பட்டது. அப்போது தவறுதலாக ரூ. 100 தாள்களை வைக்க வேண்டிய பகுதியில் ரூ. 500 தாள்களை வைத்துவிட்டேன்.

மே 21-ஆம் தேதி காலை இந்தத் தவறு கண்டறியப்பட்டு சரி செய்யப்பட்டது. ஆனாலும், ரூ. 1.40 லட்சம் கணக்கில் வரவில்லை. பணம் எடுத்த வாடிக்கையாளா்களுக்கு கூடுதலாகச் சென்றுள்ளது. எனவே, அந்த வாடிக்கையாளா்களின் விவரங்களை சேகரித்து அவா்களிடம் இருந்து அதிகப்படியாக சென்ற பணத்தை மீட்டுத் தர வேண்டும் என்று குறிப்பிடப்பட்டுள்ளது. புகாரைப் பெற்றுக் கொண்ட போலீஸாா் விசாரணை நடத்தி வருகின்றனா்.