பொங்கல் பரிசுக்காக 5.27 லட்சம் கரும்புகள்

பொங்கல் பண்டிகைக்கு அரிசி அட்டைதாரர்களுக்கு ஒரு கரும்பு, ஒரு கிலோ சர்க்கரை, ஒரு கிலோ பச்சரிசி, ரூ.1000 வழங்கப்படும் என தமிழக அரசு அறிவித்தது. அதன்படி இன்று 7-ந் தேதி முதல் டோக்கன் வினியோகிக்கும் பணி துவங்கியது. 10-ந் தேதி முதல் பொங்கல் பரிசுத் தொகுப்பு வழங்கும் பணியும் தொடங்கப்பட உள்ளது. தூத்துக்குடி மாவட்டத்தில் தூத்துக்குடி, ஸ்ரீவைகுண்டம், ஏரல், திருச்செந்தூர், சாத்தான்குளம், கோவில்பட்டி, கயத்தாறு, விளாத்திகுளம், ஓட்டப்பிடாரம், எட்டயபுரம் ஆகிய தாலுகாக்களில் மொத்தம் 5 லட்சத்து 26 ஆயிரத்து 561 அரிசி குடும்ப அட்டைகள் உள்ளன. இவர்களுக்கு வினியோகிப்பதற்காக தேனி மாவட்டத்தில் இருந்து 5.27 லட்சம் கரும்புகள் லாரி மூலம் நேற்று தூத்துக்குடிக்கு கொண்டுவரப்பட்டன. இவை அனைத்தும் தூத்துக்குடி- எட்டயபுரம் சாலையில் உள்ள கூட்டுறவு அச்சகத்தில் பாதுகாப்பாக வைக்கப்பட்டுள்ளது. தொடர்ந்து அனைத்து ரேஷன் கடைகளுக்கும் பிரித்து அனுப்பும் பணி நடைபெற்று வருகிறது. இதனை கூட்டுறவு சங்க இணை பதிவாளர் முரளி கண்ணா பார்வையிட்டு ஆய்வு மேற்கொண்டு வருகிறார்.