ரெயில்களில் கடத்தப்பட்ட 7 கிலோ கஞ்சா பறிமுதல்

சேலம் ரெயில்வே போலீஸ் தனிப்படையினர் நேற்று முன்தினம் காலை தன்பாத்-ஆலப்புழா எக்ஸ்பிரஸ் ரெயிலில் தீவிர சோதனையில் ஈடுபட்டனர். அதில், பின்பக்க முன்பதிவில்லா பெட்டியில் பொருட்கள் வைக்கும் இடத்தில் கேட்பாரற்று ஒரு பை கிடந்தது. அதனை கைப்பற்றி போலீசார் சோதனை செய்தனர். அதில், 4 கிலோ கஞ்சா இருந்தது. அதை கடத்தி வந்த நபர் போலீசாரின் சோதனையை பார்த்து தப்பியோடி இருப்பது தெரிந்தது. இதையடுத்து 4 கிலோ கஞ்சா பறிமுதல் செய்யப்பட்டு சேலம் ரெயில்வே போலீசில் ஒப்படைத்தனர்.இதுதொடர்பாக ரெயில்வே போலீசார் வழக்குப்பதிவு செய்து கஞ்சாவை கடத்தி வந்த நபர் குறித்து விசாரணை நடத்தி வருகின்றனர்.

இதேபோல், ரெயில்வே பாதுகாப்பு குற்றப்பிரிவு போலீசார் நேற்று முன்தினம் சாலிமார்-திருவனந்தபுரம் எக்ஸ்பிரஸ் ரெயிலில் சோதனையில் ஈடுபட்டனர். அப்போது முன்பதிவில்லா பெட்டியில் கேட்பாரற்று கிடந்த பையை சோதனையிட்டனர். அதில் 3 கிலோ கஞ்சா இருப்பது தெரிய வந்தது. பின்னர் அதை பறிமுதல் செய்து ஈரோடு ரெயில்வே பாதுகாப்பு படை போலீசில் ஒப்படைத்தனர்..