தாறுமாறாக ஓடிய மினி பேருந்து மோதி சிறுவன் பலி - 3 பேர் படுகாயம்

அருப்புக்கோட்டை அருகே பாலவநத்தம் கிராமத்தைச் சேர்ந்த மீரான் பிவி(70) என்பவர் தனது பேரன் தானிஸ்(3) மற்றும் உறவினர்களுடன் அருப்புக்கோட்டை அஜீஸ் நகரில் உள்ள தனது உறவினர் இல்ல பால் காய்ச்சும் நிகழ்விற்கு சென்றுள்ளனர். பாலவநத்தம் கிராமத்தில் இருந்து பேருந்தில் அருப்புக்கோட்டை புதிய பேருந்து நிலையம் வந்து இறங்கி அஜீஸ் நகர் செல்வதற்காக பேருந்து நிலையத்தின் வெளியே ஆட்டோ பிடிப்பதற்காக நின்று கொண்டிருந்தனர். அப்போது அவ்வழியாக சௌடாம்பிகா பாலிடெக்னிக் கல்லூரியில் இருந்து திருக்குமரன் நகர் நோக்கி சென்று கொண்டிருந்த மினி பேருந்து ஒன்று தாறுமாறாக ஓடியதாக கூறப்படுகிறது. தாறுமாறாக ஓடிய அந்த மினி பேருந்து புதிய பேருந்து நிலையத்தின் வெளியே நின்று கொண்டிருந்த மீரான் பீவி உள்ளிட்டோர் மீது மோதி அங்கு நின்று கொண்டிருந்த இரண்டு ஆட்டோக்களின் மீதும் மோதி நின்றது. இந்த விபத்தில் மீரான் பீவியின் பேரன் தானிஸ்(3) படுகாயம் அடைந்து சம்பவ இடத்திலேயே உயிரிழந்தார். மேலும் மூதாட்டி மீரான் பீவி மற்றும் அங்கு சாலையோரம் நின்று கொண்டிந்த அருப்புக்கோட்டை நெசவாளர் தெருவை சேர்ந்த லெட்சுமி ப்ரியா(37), அம்மன் கோவில் தெருவை சேர்ந்த கருப்பசாமி(60) ஆகிய மூன்று பேரும் படுகாயம் அடைந்து அருப்புக்கோட்டை அரசு மருத்துவமனையில் சிகிச்சைக்காக அனுமதிக்கப்பட்டுள்ளனர். இந்த விபத்து குறித்து நகர் காவல் நிலைய போலீசார் வழக்கு பதிவு செய்து விசாரணை மேற்கொண்டு வருகின்றனர்.