புளியங்குடி சாலையில் ஆபத்தை ஏற்படுத்தும் வேகத்தடை .....

தென்காசி மாவட்டம் புளியங்குடி- சங்கரன்கோவில் சாலையில் உள்ள வேகத்தடையில் பிரதிபலிப்பான் அமைக்கப்படாததால் இரவு நேரங்களில் வாகன ஓட்டிகளுக்கு ஆபத்தை ஏற்படுத்தி வருகிறது. புளியங்குடி - சங்கரன்கோவில் சாலையில் தனியாா் கல்வி நிறுவனம் அருகே கடந்த சில தினங்களுக்கு முன்பு வேகத்தடை அமைக்கப்பட்டது. இந்த வேகத்தடையில் பிரதிபலிப்பான் அமைக்கப்படவில்லை. இதனால், இரவு நேரங்களில் வேகத்தடை இருப்பது தெரியாமல் வாகன ஓட்டிகள் பெரிதும் பாதிக்கப்பட்டு வருகின்றனா். இதுகுறித்து தமிழ்நாடு முஸ்லிம் முன்னேற்றக் கழக மாவட்ட செயலா் அப்துர்ரஹ்மான் கூறியதாவது: மேற்குறிப்பிட்ட பகுதியில் உள்ள வேகத்தடையில் பிரதிபலிப்பான் இல்லாததால், இதுவரை 3 விபத்துகள் நேரிட்டுள்ளன. வேகத்தடை இருப்பதை வாகன ஓட்டிகள் அறிந்து கொள்ளும் வகையில் உடனடியாக பிரதிபலிப்பான் அமைக்க வேண்டும் என்றாா்.