பஸ் மீது மோட்டார் சைக்கிள் மோதி ஓட்டல் ஊழியர் பலி!

சேலம் கோரிமேட்டை சேர்ந்தவர் வேங்கையன் (வயது 19). ஓட்டல் ஒன்றில் ஊழியராக வேலை செய்து வந்தார். இதற்கிடையே நேற்று வேங்கையன், அவருடைய நண்பர் பிரவீன் (20) ஆகியோர் ஒரு மோட்டார் சைக்கிளில் அரியானூரில் உள்ள நண்பரை பார்க்க சென்றனர். பின்னர் நண்பரை சந்தித்துவிட்டு மீண்டும் மோட்டார் சைக்கிளில் கொண்டலாம்பட்டி வழியாக கோரிமேட்டிற்கு வந்து கொண்டிருந்தனர். மோட்டார் சைக்கிளை வேங்கையன் ஓட்டினார். பிரவீன் பின்னால் அமர்ந்து வந்தார். அப்போது கொண்டலாம்பட்டி அருகே பட்டர்பிளை மேம்பாலத்தின் இறக்கத்தில் வந்தபோது அந்த வழியாக சென்ற பஸ்சின் பின் பகுதி பக்கவாட்டில் மோட்டார் சைக்கிள் எதிர்பாராதவிதமாக மோதியது. இதனால் வேங்கையன், பிரவீனுடன் மோட்டார் சைக்கிள் நீண்ட தூரம் இழுத்து சென்றது. பின்னர் இருவரும் மோட்டார் சைக்கிளில் இருந்து தவறி விழுந்தனர். அந்த நேரம் பெட்ரோல் ஒழுகி மோட்டார் சைக்கிள் தீப்பிடித்து எரிய தொடங்கியது. இதுகுறித்து தகவல் அறிந்து சம்பவ இடத்துக்கு சென்ற கொண்டலாம்பட்டி போலீசார் மோட்டார் சைக்கிளில் பிடித்த தீயை அணைத்ததோடு, படுகாயம் அடைந்த வேங்கையன், லேசான காயம் அடைந்த பீரவினை மீட்டு சேலம் அரசு ஆஸ்பத்திரியில் சிகிச்சைக்காக சேர்த்தனர். அங்கு சிகிச்சை பலனின்றி வேங்கையன் இறந்து விட்டார். இந்த சம்பவம் குறித்து கொண்டலாம்பட்டி போலீசார் வழக்குப்பதிவு செய்து விசாரணை நடத்தி வருகின்றனர்.