ரயில்வே சுரங்கபாதை தேங்கிய நீரில் சிக்கிய தனியார் பள்ளி வேன்

விருதுநகர் மாவடம் ஸ்ரீவில்லிபுத்தூர் மாவட்ட நீதிமன்றம் அருகே சிவகாசி சாலையில் இருந்து அச்சம்தவிழ்த்தான் செல்லும் வழியில் அத்திகுளம் கண்மாய் கரையில் ரயில்வே சுரங்கப்பாதை அமைந்துள்ளது. இந்த ரயில்வே சுரங்கப்பாதை வழியாக சித்தாலம்புத்தூர், அத்திகுளம், அச்சம்தவிழ்த்தான், நாச்சியார்கோவில், அணைத்தலப்பட்டி உள்ளிட்ட கிராமங்களுக்கு செல்ல வேண்டும். கண்மாய் கரையில் சுரங்கப்பாதை அமைந்துள்ளதால் எப்போதும் முழங்கால் அளவு தண்ணீர் தேங்கியே இருக்கிறது. இந்த சுரங்கப்பாதையில் தேங்கும் தண்ணீரை வெளியேற்றும் வசதி இருந்தும் பயன்படுத்தப்படாததால் பொதுமக்கள் சிரமப்படுகின்றனர். இந்நிலையில் இன்று மாலை சுரங்கப்பாதையில் 4 அடிக்கு மேல் தண்ணீர் தேங்கியது. இன்று காலை இவ்வழியே சென்ற இரு பணியாளர் வாகனங்கள் சுரங்கப்பாதையில் தேங்கிய மழை நீரில் சிக்கி பழுதானது. இந்நிலையில் இன்று மாலை ஸ்ரீவில்லிபுத்தூரிலிருந்து தனியார் பள்ளி வேன் நாச்சியார்பட்டியை நோக்கி சுமார் 10க்கும் மேற்பட்ட மாணவ மாணவிகளே ஏற்றுக்கொண்டு வேன் சென்றது. சித்தாளம்பத்தூர் ரயில்வே சுரங்க பாதையில் வேன் சென்ற போது மழை நீரில் சிக்கி பழுதடைந்தது. இதனால் வேனில் பயணித்த 10க்கும் மேற்பட்ட மாணவிகள் வெளியேற முடியாமல் வேனில் தவித்தனர். தகவல் அறிந்து வந்த விவசாயி ஒருவர் டிராக்டர் மூலம் கயிறு கட்டி தனியார் பள்ளி வேனை இழுத்து சென்று விட்டனர்.