இரயில் மீது ஏறி விளையாடிய பள்ளி மாணவன் மின்சாரம் தாக்கி படுகாயம்

சங்ககிரி அருகேயுள்ள ஐவேலி ஊராட்சி மாவெளிபாளையம் கிராமம் பச்சப்பட்டி பகுதியை சேர்ந்தவர் தனபால்(45). இவரது மகன் முகேஷ் (15), இவர் சங்ககிரி அரசு ஆண்கள் மேல்நிலைப்பள்ளியில் 11ஆம் வகுப்பு படித்து வருகிறார். இந்நிலையில் தற்போது கோடை விடுமுறை என்பதால் முகேஷ் நண்பர்களுடன் விளையாடுவதற்காக மாவெளிபாளையம் இரயில்வே பாதை அருகே சென்றுள்ளார்.

அப்பொழுது இரயில்வே பாதையில் நின்று கொண்டிருந்த சரக்கு இரயில் மீது ஏறி விளையாடிய முகேஷ் மீது திடீரென மின்சாரம் தாக்கி தூக்கி வீசப்பட்ட சப்தம் கேட்டு அக்கம் பக்கத்தினர் ஓடி வந்து பார்த்த பொழுது முகேஷ் மீது மின்சாரம் பாய்ந்து உடல் முழுதும் பலத்த காயங்கள் ஏற்பட்டு மயங்கிய நிலையிலிருந்து சிறுவனை மீட்டு சங்ககிரி அரசு மருத்துவமனைக்கு அனுப்பி வைத்துள்ளனர்.

அங்கு முதல் சிகிச்சை பெற்று மேல் சிகிச்சைக்காக ஈரோடு தனியார் மருத்துவமனையில் அனுமதிக்கப்பட்டுள்ளார். இது குறித்து ஈரோடு ரயில்வே போலீசார் வழக்குப்பதிந்து சிறுவன் மீது மின்சாரம் எப்படி பாய்ந்தது என்பதற்கான காரணம் குறித்து விசாரித்து வருகின்றனர். இசசம்பவம் அப்பகுதியில் பெரும் பரபரப்பையும், பதற்றத்தையும் ஏற்படுத்தியுள்ளது.