உடல் நலம் குன்றிய யானைக்கு வனத்துறை டாக்டர்கள் குழு சிகிச்சை

ஈரோடு மாவட்டம், சத்தியமங்கலம் அடுத்த பண்ணாரி வனப்பகுதி குய்யனூர் பகுதியில் உடல்நலம் பாதிக்கப்பட்ட பெண் யானை படுத்து கிடப்பதாக சத்தியமங்கலம் வனத்துறையினருக்கு காலை தகவல் கிடைத்தது. இதையடுத்து, வனத்துறையினர் சென்று பார்த்த போது 40 - 45 வயது மதிக்கத்தக்க பெண் யானை நடக்க முடியாமல் படுத்து கிடந்ததை கண்டறிந்தனர்.

அதன் அருகே 2 வயது குட்டியும் இருந்தது. இதையடுத்து அந்த குட்டி யானைக்கு புற்கள் கொடுத்து விட்டு பெண் யானைக்கு டாக்டர்கள் குழு ஊசி மூலம் குளுக்கோஸ் மற்றும் மருந்துகள் செலுத்தி சிகிச்சை அளித்து வருகின்றனர். சிகிச்சை பெற்று வரும் யானையை மற்ற யானைகள் கூட்டிச் செல்ல வருவதால் வனத்துறையினர் டிரோன் மூலம் மற்ற யானைகள் கூட்டத்தை கண்காணித்து வருகின்றனர்.