கீழ்வேளூர் அருகே நீரில் மூழ்கி வாலிபர் பலி

கீழ்வேளூர் அருகே தேமங்கலம் ஊராட்சி சிக்கவலம் நடுத்தெருவை சேர்ந்தவர் மலையபெருமாள் மகன் சங்கர் (வயது 37) . இவர் கீழ்வேளூரில் உள்ள ஓட்டலில் வேலை பார்த்து வந்துள்ளார். நேற்று முன்தினம் இரவு நாகை- திருவாரூர் தேசிய நெடுஞ்சாலையில் சிக்கவலம் பஸ் நிறுத்தம் பகுதியில் உள்ள பெரிய குளத்தில் படித்துறையில் இறங்கிய போது எதிர்பாராத விதமாக தவறி விழுந்துள்ளார்.

இந்நிலையில் நேற்று காலை அந்தப் பகுதியில் சென்றவர்கள் குளத்தில் ஆண் ஒருவர் இறந்த நிலையில் மிதப்பதாக கீழ்வேளூர் போலீசாருக்கு தகவல் தெரிவித்தனர். தகவலின் பேரில் கீழ்வேளூர் சிறப்பு போலீஸ் சப் இன்ஸ்பெக்டர் தியாகராஜன் மற்றும் போலீசார் சம்பவ இடத்திற்கு வந்து விசாரணை நடத்தினர். குளத்தில் இறந்து நிலையில் உள்ளது சங்கர் என்பது விசாரணையில் தெரியவந்தது தீயணைப்பு துறையினர் இறந்து போன சங்கரின் உடலை மீட்டனர். பின்னர் பிரேத பரிசோதனைக்காக நாகை அரசு மருத்துவக் கல்லூரி ஆஸ்பத்திரிக்கு அனுப்பி வைத்தனர். இது குறித்த புகாரின் பேரில் போலீசார் வழக்கு பதிவு செய்து விசாரணை மேற்கொண்டு வருகின்றனர்.