ஸ்கூட்டரில் இருந்து விழுந்த அங்கன்வாடி ஆசிரியை உயிரிழப்பு

கன்னியாகுமரி மாவட்டம் மண்டைக்காடு அருகே கோவிலான் விளையை சேர்ந்தவர் பால் துரை ( 61). அரசு நூலகத்தில் நூலகராக வேலை பார்த்து ஓய்வு பெற்றவர். இவரது மனைவி சரோஜா (58) சேரமங்கலம் அரசு அங்கன்வாடியில் ஆசிரியராக வேலை பார்த்து வந்தார். கடந்த சில நாட்களாக சரோஜா உடல் நலம் பாதிக்கப்பட்டு அதற்காக முட்டத்தில் உள்ள ஒரு ஆஸ்பத்திரியில் சிகிச்சை பெற்று வந்தார். இந்த நிலையில் இரண்டு நாட்களுக்கு முன் அங்கன்வாடிக்கு வேலைக்கு சென்ற சரோஜா உடல் சோர்வாக காணப்பட்டார். பின்னர் வேலை முடிந்து கணவர் பால் துரை அவரை ஸ்கூட்டரில் வீட்டுக்கு அழைத்து சென்று கொண்டிருந்தார். வீட்டு அருகே வரும்போது ஸ்கூட்டரின் பின்னால் அமர்ந்திருந்த சரோஜா திடீரென நிலை தடுமாறு கீழே விழுந்தார். உடனே அவரை மீட்டு கணவர் முட்டத்தில் உள்ள ஒரு தனியார் ஆஸ்பத்திரியில் கொண்டு சென்றார். அங்கு அவரை பரிசோதித்த டாக்டர்கள் சரோஜா ஏற்கனவே இறந்து விட்டதாக தெரிவித்தனர். இது குறித்து கணவர் பால் துரை மண்டைக்காடு போலீசில் புகார் செய்தார். போலீசார் வழக்கு பதிவு செய்து பிரேத பரிசோதனைக்காக உடலை ஆசாரிப்பள்ளம் அரசு மருத்துவ கல்லூரி ஆஸ்பத்திரியில் அனுப்பி வைத்தனர். தொடர்ந்து போலீசார் வழக்கு பதிவு செய்து விசாரணை நடத்தி வருகின்றனர்.