பிரச்சாரத்திற்கு வராத அண்ணாமலை - பாஜகவினர் ஏமாற்றம்

பெரம்பலூர் பாராளுமன்ற தேர்தலில் போட்டியிடும் ஐஜேகே கட்சி நிறுவனரும்,வேட்பாளருமான பாரிவேந்தரை ஆதரித்து நேற்றிரவு பாஜக மாநில தலைவர் அண்ணாமலை மண்ணச்சநல்லூர் சட்டமன்ற தொகுதிக்கு உட்பட்ட எதுமலை சாலை பிரிவில் பிரச்சாரம் செய்தும், தேர்தல் அலுவலகத்தை திறந்து வைக்க இருந்தார் .இந்நிலையில் சிதம்பரம், நாகப்பட்டினம்,தஞ்சாவூர் பாராளுமன்ற தொகுதியில் போட்டியிடும் பாஜக வேட்பாளர்களை ஆதரித்து தேர்தல் பிரச்சாரம் செய்தார்.பின்னர் பெரம்பலூர் பாராளுமன்ற தொகுதியில் போட்டியிடும் ஐஜேகே வேட்பாளர் பாரிவேந்தரை ஆதரித்து பெரம்பலூர் நால்ரோடு பகுதியில் தேர்தல் பிரச்சாரம் செய்தார்.

அதனை முடித்துவிட்டு மண்ணச்சநல்லூர் சட்டமன்ற தொகுதிக்கு வருவதற்குள் இரவு 10 மணிக்கு மேல் ஆனதால் தேர்தல் விதிமுறைகளின்படி பாஜக தலைவர் அண்ணாமலை தேர்தல் பிரச்சாரத்திற்க்கு வரவில்லை. பாஜக மாநில தலைவர் அண்ணாமலை மண்ணச்சநல்லூர் சட்டமன்ற தொகுதிக்கு பிரச்சாரம் செய்ய வருவார் எனவும்,அவரது பேச்சை கேட்க ஆவலாக எதிர்பார்த்து காத்திருந்த பொதுமக்கள்,கட்சி நிர்வாகிகள் கூட்டணி கட்சி நிர்வாகிகள், தொண்டர்கள் என அனைவரும் மிகுந்த ஏமாற்றத்துடன் கலைந்து சென்றனர்.