நின்று கொண்டிருந்த பைக் மீது மற்றொரு பைக் மோதல் 3 பேர் காயம்

கன்னியாகுமரி மாவட்டம், இரணியல் அருகே உள்ள கண்டன் விளை பகுதியை சேர்ந்தவர் ஏசுதாசன் (43). கட்டிடத் தொழிலாளி. இவர் சம்பவ தினம் காலையில் நுள்ளிவிளை என்ற இடத்துக்கு சென்று விட்டு தனது பைக்கில் வீடுக்கு திரும்பிக் கொண்டிருந்தார். குசவன் குழி பஸ் ஸ்டாப் அருகில் வந்தபோது, சாலையின் இடது ஓரமாக பைக் நிறுத்திவிட்டு பைக்கில் உட்கார்ந்து இருந்தார்.

அப்போது அதே சாலையில் அவருக்கு பின்னால் வேகமாக வந்த பைக் ஒன்று எதிர்பாராத விதமாக ஏசுதாசன் பைக்கின் பின்னால் மோதியது. இந்த விபத்தில் ஏசுதாசன், விபத்தை ஏற்படுத்திய பைக்கை ஒட்டி வந்த நிகில், அஜின் ஆகிய மூன்று பேரும் படுகாயம் அடைந்தனர். அக்கம் பக்கத்தினர் அவர்களை மீட்டு ஆசாரிப்பள்ளம் அரசு மருத்துவக் கல்லூரி ஆஸ்பத்திரிக்கு அனுப்பி வைத்தனர்.

இதில் ஏசுதாசன் முதலுதவி சிகிச்சைக்கு பின் நாகர்கோவில் உள்ள ஒரு தனியார் ஆஸ்பத்திரியில் சிகிச்சை பெற்று வருகிறார். இந்த சம்பவம் குறித்து ஏசுதாசன் கொடுத்த புகாரின் பேரில் இரணியல் போலீசார் வழக்கு பதிவு செய்து விசாரணை நடத்தி வருகின்றனர்.