தேசிய நெடுஞ்சாலையில் மாணவர்களை ஸ்கேட்டிங் பயிற்சியில் ஈடுபடுத்தியவர் கைது

சேலம் சீலநாயக்கன்பட்டி பைபாஸில் இருந்து மல்லூர் பிரிவு வரை சேலம் கரூர் தேசிய நெடுஞ்சாலையில் நேற்று முன்தினம் காலை 20-க்கும் மேற்பட்ட மாணவர்கள் ஸ்கேட்டிங் பயிற்சியில் ஈடுபட்டனர். வாகன போக்குவரத்து நிறைந்து காணப்படும் இந்த தேசிய நெடுஞ்சாலையில் மாணவர்கள் ஸ்கேட்டிங் பயிற்சியில் ஈடுபட்டது சமூக வலைதளங்களில் வீடியோவாக வைரலானது. இந்த நிலையில் மல்லூர் போலீசார் நேற்று ஸ்கேட்டிங் பயிற்சியில் மாணவர்களை ஈடுபடுத்திய சேலத்தைச் சேர்ந்த தனியார் ஸ்கேட்டிங் பயிற்சி நிறுவன பயிற்சியாளர் பிரபாகரனை கைது செய்தனர். மேலும் மாணவர்களை ஸ்கேட்டிங் பயிற்சிக்கு அனுப்பிய பெற்றோர்களை மல்லூர் போலீஸ் நிலையத்துக்கு வரவழைத்து சேலம் ரூரல் துணை போலீஸ் சூப்பிரண்டு அமலா அட்வின் அறிவுரை கூறினார். பிறகு தனியார் ஸ்கேட்டிங் நிறுவன பயிற்சியாளர் பிரபாகரன் நிபந்தனை ஜாமீனில் விடுவிக்கப்பட்டார்.