புதுக்கடை அருகே தாய், மகன்கள் மீது தாக்குதல் 

குமரி மாவட்டம் புதுக்கடை அருகே காப்புக்காடு பகுதி விளாத்திவிளை என்ற இடத்தை சேர்ந்தவர் கனகமணி மனைவி கலாராணி (39). கனகமணி வெளிநாட்டில் வேலை பார்க்கிறார். இவர்களுக்கு கேதரின் கென்னத் (17) , கேதரின் பெனித் (14) என்ற இரு மகன்கள் உள்ளனர். பக்கத்து வீட்டில் வசிக்கும் உறவினர்கள் அடிக்கடி கலாராணியிடம் தகராறு செய்வது வழக்கமாம்.

இந்த நிலையில் சம்பவ தினம் கலாராணியின் மகன்கள் இருவரும் டியூசன் சென்று விட்டு வீட்டு வராந்தாவில் வந்த நேரம் உறவினர்களான முத்துநாயகம் (52), கனகராஜ் (61), கீதாராணி (29), ஜேக்கப் ஜிபி ( 24), ஜேக்கப் ஜெர்லின் (21) ஆகியோர் கேத்ரின் கென்னத், கேத்ரின் பெனித் ஆகியோரை கம்பால் தாக்கியுள்ளனர். இதை தட்டிக் கேட்ட கலாராணியையும் தாக்கி அவர் அணிந்திருந்த உடையை கிழித்ததாகவும் , கத்தியை காட்டி கொலை மிரட்டல் விடுத்ததாகவும் தெரிகிறது.

இதில் கலாராணியும், அவரது மகன்கள் இருவரும் காயமடைந்தனர். காயமடைந்த 3 பேரும் குழித்துறை அரசு ஆஸ்பத்திரியில் அனுமதிக்கப்பட்டனர். இது தொடர்பான புகாரின் பேரில் முத்துநாயகம் , கனகராஜ், கீதாராணி, ஜேக்கப் ஜிபி, ஜேக்கப் ஜெர்லின் ஆகிய 5 பேர் மீது புதுக்கடை போலீசார் வழக்கு பதிவு செய்து விசாரித்து வருகின்றனர்.