காரில் கடத்த முயன்ற கஞ்சா பறிமுதல் - இருவர் கைது

குமரி மாவட்டம் கேரள எல்லை பகுதியான பளுகல் அருகே குன்னத்துக்கால் பகுதியில் வைத்து கேரள மதுவிலக்கு பிரிவு ஆணையாளர் அனில் குமார் தலைமையிலான போலீசார் வாகன கண்காணிப்பில் ஈடுபட்டிருந்தனர். அப்போது தமிழக பகுதியில் இருந்து கேரளத்துக்கு சந்தேகப்படும் வகையில் சென்ற சொகுசு காரை தடுத்து நிறுத்தினர். உடனே கார் ஓட்டுனர்கள் உள்ளிட்ட இருவர் காரில் இருந்து தப்பி ஓடிவிட்டனர். தொடர்ந்து காரை சோதனை செய்ததில் அதில் 45 கிலோ கஞ்சா பதுக்கி வைத்திருந்தது தெரியவந்தது. காருடன் கஞ்சாவை போலீசார் பறிமுதல் செய்தனர். இதை தொடர்ந்து கஞ்சா கடத்தலுக்கு பாதுகாப்புக்கு வந்த மற்றொருவரை தடுத்து நிறுத்தி அதில் இருந்த இருவரை பிடித்து விசாரணை செய்தனர். விசாரணையில் அவர்கள் கஞ்சா கடத்தல் காரர்களுக்கு பாதுகாப்புக்காக வந்ததாகவும், அவர்கள் விஜித், ஷான் எனவும் தெரிவித்தனர். இருவரையும் போலீசார் கைது செய்து, விசாரணை மேற்கொண்டு வருகின்றன.