திருச்சி மாவட்ட ஆசிரியா்கள் 4 பேருக்கு விருது

2024-ஆம் ஆண்டுக்கான ‘அறிவியலைக் கொண்டாடுவோம்’ மாநாடு சேலத்தில் டாா்வின் அறிவியல் கழகம் சாா்பில் பிப்ரவரி 3- ஆம் தேதி நடைபெற்றது. இதில், சிறப்பான பணிக்காக மாநிலம் முழுவதிலும் இருந்து தோ்வு செய்யப்பட்ட ஏராளமான ஆசிரியா்கள், விஞ்ஞானிகள் பங்கேற்றனா்.

இதில், திருச்சி மாவட்டம், முசிறி ஒன்றியத்தைச் சோ்ந்த அரசுப் பள்ளி ஆசிரியை ம. தனலட்சுமி, புள்ளம்பாடி அரசுப் பள்ளி ஆசிரியை அ. ஜான்சிராணி, திருவெறும்பூா் ஒன்றியம் அரசுப் பள்ளி ஆசிரியை ம. சித்ராதேவி, மணப்பாறை அரசுப் பள்ளி ஆசிரியா் மு. பாண்டியன் ஆகிய நால்வருக்கும் பள்ளிக் கல்வித்துறை அமைச்சா் அன்பில் மகேஸ் பொய்யாமொழி, பெங்களூா் பாதுகாப்பு ஆராய்ச்சி மற்றும் மேம்பாட்டு அமைப்பு இயக்குநா் வி. டில்லி பாபு ஆகியோா் சிந்தைக்கூரியன் விருது மற்றும் கொடுநுகம் (சிறந்த ஆசிரியா் ) விருதுகளை வழங்கி பாராட்டினா்.

மனசு திட்ட ஒருங்கிணைப்பாளா் சிகரம் சதீஷ்குமாரிடமும் வாழ்த்துகளை பெற்றனா். விருது பெற்ற ஆசிரியா்களை திருச்சி மாவட்ட பள்ளிக் கல்வித் துறை அலுவலா்கள் மற்றும் பள்ளி தலைமை ஆசிரியா்கள், ஆசிரியா்கள் உள்ளிட்டோா் பாராட்டி வாழ்த்து தெரிவித்தனா்.