ஓமலூர் அருகே இருசக்கர வாகனத்தில் சென்றவர் டிராக்டர் மீது மோதி உயிரிழப்பு

சேலம் மாவட்டம், ஓமலூரை அடுத்த தாரமங்கலம் அருகே உள்ள ஆரூர்பட்டி ஊராட்சி கணக்குபட்டியை சேர்ந்த சேர்வை என்பவருடைய மகன் மாரியப்பன் 45 வயதானவர். இவர் ஓமலூர் அருகே உள்ள தின்னப்பட்டியில் தங்கி தறி வேலை செய்து கொண்டு வசித்து வந்தார். இந்த நிலையில் நேற்று மாலை சுமார் 7 மணி அளவில் அவரது இருசக்கர வாகனத்தில் காமலாபுரத்தில் இருந்து தின்னப்பட்டி செல்லும் சாலையில் தின்னப்பட்டி நோக்கி சென்று கொண்டிருந்தார். அப்பொழுது எதிர்பாராமல் எதிரே வந்த கரும்பு பாரம் ஏற்றி வந்த ஒரு டிராக்டர் மீது இவரது இருசக்கர வாகனம் மோதி டிராக்டரின் பின் சக்கரத்தில் சிக்கி அவர் சாலையில் சிறிது தூரம் இழுத்துச் சென்ற நிலையில் சம்பவ இடத்திலேயே பரிதாபமாக உயிரிழந்தார். சம்பவம் அறிந்த ஓமலூர் போலீசார் பிரேதத்தை பரிசோதனைக்காக அரசு மருத்துவமனைக்கு அனுப்பி வைத்து வழக்கு பதிவு செய்து விசாரணை நடத்தி வருகின்றனர்.