சேலத்தில் பைக் திருடன் கைது

சேலம் குகை மாரியம்மன் கோயில் அருகில் உள்ள பழனிதெருவை சேர்ந்தவர் பூபதி (30). இவர், கடந்த 28ம் தேதி மதியம் தனது வீட்டின் முன்பு பைக்கை நிறுத்திவிட்டு உள்ளே சென்றார். சிறிது நேரத்தில் வெளியே வந்து பார்த்தபோது, பைக்கை காணவில்லை.

மர்மநபர் திருடிச்சென்றது தெரியவந்தது. இதுபற்றி செவ்வாய்பேட்டை போலீசில் பூபதி புகார் கொடுத்தார். போலீசார் விசாரணை நடத்தி வந்தனர். இதனிடையே நேற்று முன்தினம் இரவு பூபதி தனது நண்பர்களுடன் களரம்பட்டி பகுதிக்கு சென்றார். அங்கு அவரது பைக்கை வாலிபர் ஒருவர் வைத்திருந்ததை பார்த்து, அவரை மடக்கி பிடித்தனர்.

பின்னர், செவ்வாய்பேட்டை போலீசில் அந்த வாலிபரை, ஒப்படைத்தனர். போலீசாரின் விசாரணையில் அவர், கொண்டலாம்பட்டி எஸ்.நாட்டாமங்கலம் மாரியம்மன் கோயில் தெருவை சேர்ந்த கிருஷ்ணன் (31) எனத்தெரியவந்தது. அவரை போலீசார் கைது செய்து, பைக்கை மீட்டனர். பின்னர், கைதான கிருஷ்ணனை சேலம் கோர்ட்டில் ஆஜர்படுத்தி, மத்திய சிறையில் அடைத்தனர்.