பைக்குகள் நேருக்கு நேர் மோதல்: வாலிபர் பலி

தென்காசி மாவட்டம் வாசுதேவநல்லூர் அருகே உள்ள சொக்கநாதன்புதூர் பட்டிணத்தார் கோவில் தெருவைச் சேர்ந்தவர் மாடசாமி மகன் குமரேசன்(25). செங்கல் சூளை தொழிலாளியான இவர் நேற்று மாலை வேலையை முடித்து விட்டு பைக்கில் தென்காசி-மதுரை சாலையில் ஊருக்கு சென்று கொண்டிருந்தார். அந்த வழியே விவசாய வேலையை முடித்து விட்டு சிவகிரி கீழ மாரியம்மன் கோவில் தெருவைச் சேர்ந்த ராமர் மகன் சீனிவாசன் (46) பைக்கில் வீட்டிற்கு சென்று கொண்டிருந்தார்.

சிவகிரி கண்மாய் விலக்கு பகுதியில் சீனிவாசன் ஓட்டி வந்த பைக்கும், குமரேசன் ஓட்டி வந்த பைக்கும் நேருக்கு நேர் மோதி விபத்துக்குள்ளானது. இந்த விபத்தில் படுகாயம் அடைந்த குமரேசன் சிறிது நேரத்தில் அதே இடத்தில் பரிதாபமாக இறந்தார். படுகாயமடைந்த சீனிவாசன் சிவகிரி அரசு மருத்துவமனை யில் அனுமதிக்கப்பட்டு மேல் சிகிச்சைக்காக மதுரை அரசு மருத்துவமனையில் சேர்க்கப்பட்டார். இது குறித்து சிவகிரி போலீசார் வழக்கு பதிவு செய்து குமரேசன் உடலை கைப்பற்றி பிரேத பரிசோதனைக்காக சிவகிரி அரசு மருத்துவ மனைக்கு அனுப்பி வைத்து விசாரணை நடத்தி வருகின்றனர்.