சேலம் அருகே கன்டெய்னர் லாரி கவிழ்ந்து சிறுவன் பலி !

சேலம் ஜாகீர் அம்மாபாளையம் காந்திநகர் பகுதியைச் சேர்ந்தவர் விஷ்ணு ஜவகர் (வயது 17). இவர் நேற்று முன்தினம் இரவு பாரதி நகரைச் சேர்ந்த விஷால்குமார் (18) மற்றும் இன்னொரு 16 வயது நண்பருடன் ஒன்றாக மோட்டார் சைக்கிளில் டால்மியா காலனிக்கு சென்றார். அதன்பிறகு அவர்கள் நள்ளிரவில் வீட்டிற்கு வந்து கொண்டிருந்தனர்.

மாமாங்கம் அருகே வந்தபோது சாலையை கடக்க முயன்றனர். அப்போது ஓமலூரில் இருந்து சேலம் நோக்கி கன்டெய்னர் லாரி ஒன்று வந்தது. திடீரென 3 பேரும் சென்ற மோட்டார் சைக்கிள் சாலையின் குறுக்கே வந்ததாக தெரிகிறது. அப்போது கன்டெய்னர் லாரி டிரைவர் திடீரென பிரேக்கை பிடித்தார். இதில் நிலைதடுமாறிய கன்டெய்னர் லாரி நடுரோட்டில் கவிழ்ந்தது. அப்போது மோட்டார் சைக்கிளில் சென்ற 3 பேரும் லாரிக்கு அடியில் சிக்கினர்.

இதில் ஜவகருடன் சென்ற 16 வயது சிறுவன் சம்பவ இடத்திலேயே லாரிக்கு அடியில் சிக்கி உயிரிழந்தான். மற்ற 2 பேரும் படுகாயம் அடைந்தனர். தகவல் அறிந்த சூரமங்கலம் போலீசார் சம்பவ இடத்துக்கு விரைந்து வந்தனர். விபத்தில் சிக்கி காயம் அடைந்த 2 பேரையும் மீட்டு சேலம் அரசு ஆஸ்பத்திரிக்கு அனுப்பி வைத்தனர். பலியான சிறுவன் உடலை மீட்டு பிரேத பரிசோதனைக்கு அனுப்பி வைத்தனர்.

கன்டெய்னர் லாரி சாலையின் நடுவே கவிழ்ந்து கிடந்ததால் அந்த பகுதியில் போக்குவரத்து பாதிக்கப்பட்டது. பொக்லைன் எந்திரம் மூலம் லாரி அகற்றப்பட்டு போக்குவரத்து சரிசெய்யப்பட்டது. இந்த விபத்தில் காயம் அடைந்த 2 பேரும் மயக்கநிலையில் இருந்ததால் இறந்த சிறுவன் யார்? என்று அடையாளம் காண முடியவில்லை என போலீசார் தெரிவித்தனர். இருந்தாலும் விபத்தில் இறந்தவர் குறித்து விசாரணை நடந்து வருகிறது.