சொத்து தகராறில் தம்பியை கல்லால் தாக்கிய அண்ணன் கைது

அன்னவாசல் அருகே உள்ள சித்தன்னவாசல், சத்திரத்தைச் சேர்ந்தவர் நல்லம்மாள், சின்னையா மகன்கள் பிச்சை (38), கருப்பையா(32). இருவருக்கும் இடையே சொத்துப் பிரச்னை இருந்துவந்ததாம். இந்நிலையில், பிச்சை மகனுக்கு உடல்நலக் கோளாறு ஏற்பட்டதற்கு, தனது தம்பி கருப்பையா மாந்திரீகம் செய்தது தான் காரணம் என நினைத்து, கருப்பையாவிடம் அவரது அண்ணன் பிச்சை தகராறில் ஈடுபட்டார். இதில், பெரிய அரளை கல்லை கருப்பையா தலையில் போட்டதில் பலத்த காயமடைந்த அவர் ஆபத்தான நிலையில் அரசு மருத்துவமனைக்கு அனுப்பிவைக்கப்பட்டார். புகாரின்பேரில், வழக்கு பதிந்து போலீஸார் பிச்சையைக் கைது செய்து சிறையில் அடைத்தனர்.