நாமக்கலில் வேட்பாளர்களின் குரல் ஒரே மேடையில் ஒலிக்கிறது!

நாமக்கல் தமிழ்ச்சங்கம் சார்பில் மாதந்தோறும் இலக்கியம் சார்ந்த பல்வேறு நிகழ்வுகள் நடைப்பெற்று வருகிறது. தற்போது தேர்தல் காலம் என்பதால் மக்கள் மத்தியில் 100% வாக்குப்பதிவு விழிப்புணர்வு நிகழ்ச்சியை நாமக்கல் தமிழ்ச்சங்கம் முன்னெடுக்கிறது.

மேலும் , நாமக்கல் மாவட்டத்தில் செயல்பட்டுவரும் பல்வேறு சமூக அமைப்புகளான வணிகர் சங்கங்களின் பேரமைப்பு, லயன்ஸ், ரோட்டரி, JCI , அபெக்ஸ், நாமக்கல் கம்பன் கழகம், நாமக்கல் கவிஞர் சிந்தனைப் பேரவை, மற்றும் பசுமை நாமக்கல் அமைப்புக்கள் ஒருங்கிணைந்து நாமக்கல் வேட்பாளரின் குரல் என்ற இந்த நிகழ்ச்சி வருகிற மார்ச் 30- ந் தேதி சனிக்கிழமை மாலை 5 மணியளவில் நாமக்கல் - திருச்சி சாலையில் உள்ள நளா ஹோட்டலில் நடைப்பெறுகிறது, அனுமதி இலவசம் என்று நிகழ்ச்சி அமைப்பாளர்கள் தெரிவித்தனர்.

இந்த நிகழ்வில் நாமக்கல் பாராளுமன்ற தொகுதியில் போட்டியிடும் திமுக தலைமையிலான கூட்டணியில் அங்கம் வகிக்கும் கொங்கு நாடு மக்கள் தேசியக் கட்சியின் வேட்பாளர் மாதேஸ்வரன், அதிமுக வேட்பாளர் ராஹா தமிழ்மணி, பாஜக வேட்பாளர் டாக்டர் கே.பி. இராமலிங்கம், நாம் தமிழர் கட்சி வேட்பாளர் கனிமொழி ,தமிழக மக்கள் தன்னுரிமைக் கட்சி வேட்பாளர் மருத்துவர் எழில்செல்வன், அகிம்சா ஷோலிஸ்ட் கட்சி வேட்பாளர் காந்தியவாதி ரமேஷ் ஆகியோர் ஒரே மேடையில் பேசுகின்றனர்.

இந்த நிகழ்ச்சிக்கு நாமக்கல் தங்கம் மருத்துவமனை இயக்குனர் டாக்டர் குழந்தைவேல் தலைமை தாங்குகிறார். நாமக்கல் பாராளுமன்ற தொகுதியில் போட்டியிடும் அனைத்து வேட்பாளர்களும் ஒரே மேடையில் பேசுவது மக்களிடையே மிகுந்த எதிர்பார்ப்பை ஏற்படுத்தியுள்ளது என்பது குறிப்பிடத்தக்கது.