லாரி மீது கார் மோதி விபத்து - ஒருவர் பலி , 4 பேர் காயம்

திருப்பூர் மாவட்டம் வீரபாண்டி பிரிவு மற்றும் மங்களம் ரோடு பகுதியைச் சேர்ந்தவர்கள் சௌந்தர் வயது 32, ரித்தீஷ் வயது 20, சிவானந்தன் வயது 33, கோகுல் சபரி வயது 33 மற்றும் அக்தர் சிஷக் வயது 23 ஆகிய ஐந்து பேரும் திருப்பூர் ஆதார் நெட்டிங் கம்பெனியில் வேலை பார்த்து வருகின்றனர். இவர்கள் ஐந்து பேரும் நேற்று காலை காரில் கோவை திருச்சி நெடுஞ்சாலையில் காங்கேயம் நோக்கி வந்து கொண்டிருந்தனர்.

அப்போது காங்கேயம் அகஸ்தியலிங்கம்பாளையம் அருகே உள்ள தனியார் பெட்ரோல் பங்க் அருகில் வந்துகொண்டிருந்த போது சாலையோரம் நிறுத்தி வைக்கப்பட்டிருந்த லாரியின் மீது அதிவேகமாக மோதி விபத்துக்குள்ளானது. இதில் முன்பக்க ஓட்டுனர் இருக்கைக்கு பக்கத்து இருக்கையில் அமர்ந்திருந்த சௌந்தர் என்பவர் பெரும் இரத்த காயங்களுடனும், உடன் இருந்தவர்கள் கை, கால், தலை மற்றும் முகம் ஆகியவற்றில் காயங்கள் ஏற்பட்டு துடித்துக் கொண்டிருந்தனர். உடனே அருகில் இருந்தவர்கள் விபத்துக்குள்ளான ஐந்து பேரையும் மீட்டு தனியார் ஆம்புலன்ஸ் மூலம் காங்கேயம் அரசு தலைமை மருத்துவமனைக்கு கொண்டு சென்றனர். அங்கு பரிசோதித்த மருத்துவர் சௌந்தர் ஏற்கனவே இறந்து விட்டதாக தெரிவித்துள்ளார்.

பின்னர் உடன் இருந்த நான்கு பேருக்கும் முதலுதவி சிகிச்சை அளிக்கப்பட்டு திருப்பூர் தனியார் மருத்துவமனைக்கு அனுப்பி வைக்கப்பட்டனர். இதனை தொடர்ந்து காங்கேயம் போலிஷார் வழக்கு பதிவு செய்து இந்த விபத்து குறித்து விசாரணை மேற்கொண்டு வருகின்றனர்.