கார்-டூவீலர் நேருக்கு நேர் மோதல் - 3 பேர் படுகாயம்

கரூர் மாவட்டம், அரவக்குறிச்சி, வெஞ்சமாங்கூடலூர் அருகே உள்ள ராசாப்பட்டி பகுதியைச் சேர்ந்தவர் ஜெகதீசன் வயது 37. இவரது மகன் பவன் ஸ்ரீ வயது 10-, மகள் சுபஸ்ரீ வயது 8-. இவர்கள் மூன்று பேரும், பிப்ரவரி ஒன்பதாம் தேதி மாலை 5:30 மணி அளவில், ராசா பட்டியிலிருந்து தடா கோவில் செல்லும் சாலையில் அவர்களது டூவீலரில் சென்று கொண்டு இருந்தனர். இவர்களது வாகனம் கணக்குவேலம்பட்டி பிரிவு சாலை அருகே வந்தபோது, எதிர் திசையில் கணக்கு வேலம்பட்டி, தடாகோவில் பகுதியைச் சேர்ந்த முத்துராஜ் என்பவர் ஓட்டி வந்த மாருதி பிரீசா கார், ஜெகதீசன் ஒட்டிச் சென்ற டூவீலர் மீது நேருக்கு நேர் மோதி விபத்து ஏற்பட்டது.

இந்த விபத்தில் டூவீலரில் சென்ற மூவருக்கும் பலத்த காயங்கள் ஏற்பட்டதால், உடனடியாக அவர்களை மீட்டு தனியார் ஆம்புலன்ஸ் மூலம் கரூர் அரசு மருத்துவக் கல்லூரி மருத்துவமனையில் பவன் ஸ்ரீ மற்றும் சுபஸ்ரீ ஆகியோரை சிகிச்சைக்காக அனுமதித்தனர். ஜெகதீசனை நாமக்கல்லில் உள்ள சிவலிங்கம் மருத்துவமனையில் சிகிச்சைக்காக அனுமதித்தனர். இந்த சம்பவம் தொடர்பாக ஜெகதீசன் அளித்த புகாரின் பேரில், சம்பவ இடத்திற்கு சென்று விசாரணை மேற்கொண்ட காவல்துறையினர், காரை வேகமாகவும், அஜாக்கிரதையாகவும் ஓட்டி விபத்து ஏற்படுத்திய, முத்துராஜ் மீது வழக்கு பதிவு செய்துள்ளனர்