தொழில்நுட்பக் கோளாறு சென்னை- தூத்துக்குடி விமானம் காலதாமதம்

சென்னையிலிருந்து தூத்துக்குடிக்கு நேற்று புறப்பட்ட விமானம், தொழில்நுட்பக் கோளாறு காரணமாக 2.30 மணி நேரம் தாமதமாக வந்துசோ்ந்தது. தூத்துக்குடி-சென்னை இடையே நாள்தோறும் 3 விமான சேவையும், தூத்துக்குடி- பெங்களூரு இடையே ஒரு விமான சேவையும் நடைபெறுகிறது. இந்நிலையில், சென்னையிலிருந்து நேற்று காலை 10.35-க்கு புறப்பட்டு, தூத்துக்குடிக்கு முற்பகல் 11.55 மணிக்கு வரவேண்டிய விமானம், தொழில்நுட்பக் கோளாறு காரணமாக 2.30 மணி நேரம் தாமதமாக வந்தது. இதனால், அந்த விமானத்தில் வந்த தமிழ் மாநில காங்கிரஸ் தலைவா் ஜி.கே. வாசன் உள்ளிட்ட பயணிகள் மிகுந்த சிரமத்துக்குள்ளாகினா். இதேபோல, பெங்களூரிலிருந்து தூத்துக்குடிக்கு பிற்பகல் 2.05 மணிக்கு வரவேண்டிய விமானமும் தொழில்நுட்பக் கோளாறால் ஒரு மணி நேரம் தாமதமாக வந்தது.