பள்ளப்பட்டியில் "மக்களுடன் முதல்வர் திட்டம்"- ஆய்வு செய்த எம்எல்ஏ இளங்கோ

பள்ளப்பட்டியில் "மக்களுடன் முதல்வர் திட்டம்" முகாமில் மனுக்கள் பெறும் நிகழ்வை ஆய்வு செய்த எம்எல்ஏ இளங்கோ. தமிழக அரசின் சேவைகள் பொதுமக்களை விரைவாகவும், எளிதாகவும் சென்று சேர்ந்திட வழி வகுக்கும் "மக்களுடன் முதல்வர் திட்டம்" முதலமைச்சர் ஸ்டாலின் கோவையில் சில தினங்களுக்கு முன்பு துவக்கி வைத்தார். அரசு துறைகளை அன்றாடம் அணுகும் பொது மக்களுக்கு, அரசு அலுவலர்கள் வழங்கும் சேவைகளை, மேலும் திறமையுடன் செயல்படுத்திட திட்டமிட்டு, அரசின் சேவைகள் விரைவாகவும், எளிதாகவும்,நிர்வாகத்தில் வெளிப்பட தன்மையை ஏற்படுத்தி, பொதுமக்களை சென்று சேரும் வகையில் இத்திட்டம் அமைக்கப்பட்டுள்ளது. இந்த முகாம்களில் பெறப்படும் மனுக்களுக்கு 30 நாட்களில், உரிய முறையில் பரிசீலனை செய்து, தகுதியின் அடிப்படையில், அரசின் சேவைகளை பொதுமக்களுக்கு வழங்க முதல்வர் உத்தரவிட்டுள்ளார். இந்த முகாமில், எரிசக்தி துறை,மின்சார வாரியம், வருவாய் மற்றும் பேரிடர் மேலாண்மை துறை, நகராட்சி நிர்வாக மற்றும் குடிநீர் வழங்கல் துறை, ஊரக வளர்ச்சி துறை, காவல் துறை, வீட்டு வசதி மற்றும் நகர்ப்புற வளர்ச்சி துறை, மாற்றுத்திறனாளிகள் நலத்துறை உள்ளிட்ட துறைகளின் சார்பில், கரூர் மாவட்டம் அரவக்குறிச்சி தாலுகா பள்ளப்பட்டியில் உள்ள சுல்தார் ஹபிபுல்லாஹ் மஹாலில் முகாம் அமைக்கப்பட்டு, பொதுமக்களிடமிருந்து மனுக்கள் பெரும் நிகழ்ச்சி நடைபெற்றது. இந்த முகாமில், பள்ளப்பட்டி நகராட்சி பகுதியில் வசிக்கும் பொதுமக்கள் கலந்து கொண்டு, தங்கள் குறைகள் குறித்து மனுக்களாக கொடுத்தனர். மனுக்களை பெற்றுக் கொண்ட அதிகாரிகள் ஆன்லைனில் பதிவேற்றம் செய்தனர். இந்த முகாமை அரவக்குறிச்சி சட்டமன்ற உறுப்பினர் இளங்கோ நேரில் சென்று பார்வையிட்டார். அப்போது பொது மக்களின் குறைகளை கேட்டு அறிந்து அதிகாரிகளுக்கு தேவையான ஆலோசனைகளை வழங்கினார். இந்த நிகழ்ச்சியில் பள்ளப்பட்டி நகராட்சி தலைவர் முனைவர் ஜான், அரவக்குறிச்சி கிழக்கு ஒன்றிய செயலாளர் மணிகண்டன், அரவக்குறிச்சி பேரூர் கழக நகர செயலாளர் பி. எஸ் மணி, பள்ளப்பட்டி நகர செயலாளர் வாசிம் ராஜா, ஆணையர் பால்ராஜ் உள்ளிட்டோர் கலந்து கொண்டு முகாமை சிறப்பித்தனர்.