சோழிங்கநல்லுார் மண்டலக்குழு கூட்டம்

சோழிங்கநல்லுார் மண்டலக்குழு கூட்டம், மண்டல தலைவர் மதியழகன் தலைமையில், நேற்று நடந்தது. மாநகராட்சி, குடிநீர் வாரியம் உள்ளிட்ட துறை அதிகாரிகள் பங்கேற்றனர். அ. தி. மு. க. , பெண் கவுன்சிலர் அஸ்வினி, தன் கைக்குழந்தையுடன் பங்கேற்றார்.

கவுன்சிலர்கள் பேசியதாவது; கோவிந்தராஜ், அ. தி. மு. க. , 193வது வார்டு: துரைப்பாக்கத்தில், நுழைவாயில் பிரச்சனைக்கு தீர்வு கண்ட பின், மயானம் கட்ட வேண்டும். சாய் நகர் வெள்ள பாதிப்புக்கு தீர்வு காண வேண்டும்.

விமலா கர்ணா, தி. மு. க. , 194வது வார்டு: பெத்தல் நகரில், குடிநீர், சாலை வசதி முறையாக வழங்காததால் மக்கள் மிகவும் சிரமப்படுகின்றனர்.

ஏகாம்பரம், தி. மு. க. , 195வது வார்டு: ஒக்கியம் துரைப்பாக்கத்தில் கேட்பாரற்ற வாகனங்களை அகற்ற வேண்டும். எழில் நகரில் குழாய் உடைந்து குடிநீர் விணாவதால் மக்களுக்கு சீரான குடிநீர் கிடைப்பதில்லை.

அஸ்வினி கர்ணா, அ. தி. மு. க. , 196வது வார்டு: கண்ணகிநகரில் முதியோர் இல்லம் அமைக்க வேண்டும். வியாபாரிகளுக்கு கடைகள் கட்டி கொடுக்காததால் சாலையோரம் நடத்தி வருகின்றனர்.

மேனகா சங்கர், அ. தி. மு. க. , 197வது வார்டு: பனையூரில் பணி முடிந்த கழிவுநீர் திட்டத்தை பயன்பாட்டிற்கு விட வேண்டும். மக்கள் நடமாட்டம் இல்லாத பகுதிகளில் சாலை சீரமைக்கப்படுகிறது. நடமாட்டம் உள்ள பகுதியில் சீரமைப்பதில்லை.