பொதுமக்கள் சாலை மறியலால் பரபரப்பு

சேலம் மாவட்டம், சூரமங்கலம் அருகே உள்ள சேலத்தாம்பட்டி பகுதியில் மாரியம்மன் கோவிலில் திருவிழா நடைபெற்று வருகிறது. நேற்று முன்தினம் இரவு மஞ்சள் நீராட்டு விழா நடைபெற்றது. இதனிடையே ஒலிப்பெருக்கியை பயன்படுத்துவது தொடர்பாக இருதரப்பினரிடையே தகராறு ஏற்பட்டது. பின்னர் இது மோதலாக மாறியது. இதில் ஒருவரையொருவர் தாக்கி கொண்டனர். இந்த சம்பவம் குறித்து இருதரப்பை சேர்ந்தவர்களும் சூரமங்கலம் போலீஸ் நிலையத்தில் புகார் கொடுத்தனர்.

அதன்பேரில் போலீசார் வழக்குப்பதிவு செய்து நேற்று இருதரப்பை சேர்ந்த 6 பேரை கைது செய்தனர். சாலை மறியல் வழக்கில் தொடர்புடைய மேலும் சிலரை போலீசார் தேடி வருகின்றனர். இதற்கிடையில் கைதானவர்களை விடுவிக்க கோரி போலீஸ் நிலையம் முன்பு இரவில் நூற்றுக்கும் மேற்பட்ட பொதுமக்கள் திடீரென சாலை மறியலில் ஈடுபட்டனர்.

இதனால் அங்கு பரபரப்பு ஏற்பட்டது. இதையடுத்து அவர்களிடம் போலீஸ் இன்ஸ்பெக்டர் சிவகுமார் மற்றும் போலீசார் பேச்சுவார்த்தை நடத்தினர். பின்னர் அவர்கள் அங்கிருந்து கலைந்து சென்றனர். சாலை மறியலினால் அந்த பகுதியில் சிறிது நேரம் போக்குவரத்து பாதிப்பு ஏற்பட்டது.