தடுப்பு சுவரில் கார் மோதி கல்லூரி மாணவர் மரணம்

சேலம் அம்மாபேட்டை பூவாத்தாள் தெருவை சேர்ந்தவர் செந்தில்குமார். இவருடைய மகன் சிவஹரி (வயது 19) இவர் சேலத்தில் உள்ள ஒரு தனியார் கல்லூரியில் பி.காம். சி.ஏ. முதலாம் ஆண்டு படித்து வந்தார். இதே கல்லூரியில் படிப்பவர்கள் அம்மாபேட்டையை சேர்ந்த முகமது பாஷா (20), சபரிநேயன் (19). மாணவர்களான இவர்கள் 3 பேரும் கல்லூரி முடிந்து காரில் அரியானூர் வந்தனர். பின்னர் அங்கிருந்து வீட்டிற்கு செல்வதற்காக காரில் சென்றனர். காரை சிவஹரி ஓட்டி வந்து உள்ளார்.

அப்போது திடீரென சாலையில் நடுவில் உள்ள தடுப்பு சுவரில் கார் மோதி தூக்கி வீசியது. இதில் கார் அப்பளம் போல் நொறுங்கியது. இடிபாடுகளில் சிக்கி சம்பவ இடத்திலேயே சிவஹரி இறந்து போனார். மற்ற 2 பேர் படுகாயம் அடைந்தனர். தகவல் அறிந்த கொண்டலாம்பட்டி போலீசார் சிவஹரி உடலை மீட்டு பிரேத பரிசோதனைக்கு சேலம் அரசு ஆஸ்பத்திரிக்கு அனுப்பி வைத்தனர். காயம் பட்ட 2 பேரை மீட்டு சேலத்தில் உள்ள ஒரு தனியார் மருத்துவமனையில் சேர்த்தனர். பின்னர் வழக்குப்பதிவு செய்து விசாரணை நடத்தி வருகின்றனர்.