கன்வேயர் மோட்டார் திருட்டு - 3 பேர் கைது

கரூர் மாவட்டம், புகலூர் தாலுகா புன்னம் பகுதியைச் சேர்ந்தவர் சக்திவேல் வயது 37. இவர் அருகிலுள்ள கிரசர் மேடு பகுதியில் செயல்படும் வி எஸ் டி கிரஷர் நிறுவனத்தில் மேலாளராக பணியாற்றி வருகிறார். இந்நிலையில், மார்ச் 30 ஆம் தேதி அதிகாலை 2 மணி அளவில், பணியில் இருந்த சக்திவேலுக்கு இயற்கை அழைப்பு ஏற்பட்டதால் கழிவறைக்கு சென்று உள்ளார்.

அப்போது கிரஷருக்குள் நுழைந்த, புகலூர் தாலுக்கா, புன்னம் சத்திரம், எம்ஜிஆர் நகரை சேர்ந்த பழனி வயது 19, நவீன் பிரசாத் வயது 19, மாதேஷ் வயது 19 இவர்கள் 3 பேரும் கிரஷர் நிறுவனத்திற்குள் நுழைந்து அங்கு பயன்படுத்தப்பட்டு வந்த கன்வேயர் மோட்டாரை களவாடி சென்றுள்ளனர். கழிவறைக்குச் சென்ற பின் மீண்டும் பணியிடத்துக்கு வந்த சக்திவேல், மூவரும் சேர்ந்து மோட்டாரை களவாடி சென்றதைக் கண்டு அவர்களை கையும் களவுமாக பிடித்தனர்.

இது தொடர்பாக வேலாயுதம்பாளையம் காவல்துறையினருக்கு அளித்த புகாரின் பேரில்,சம்பவ இடத்திற்கு வந்த காவல் துறையினர், குற்றச் செயலில் ஈடுபட்ட மூவரையும் கைது செய்து, அவர்கள் மீது வழக்கு பதிவு செய்து, நீதிமன்றத்தில் ஆஜர் படுத்தி, சிறையில் அடைத்து நடவடிக்கை மேற்கொண்டனர்.