விம்மி விம்மி அழுத துரை வைகோ

திருச்சி நாடாளுமன்ற தொகுதியில் பதிவான வாக்கு எண்ணிக்கை இன்று காலை டி.வி.எஸ்., டோல்கேட் பகுதியில் உள்ள ஜமால் முகமது கல்லுாரியில் நடைபெற்றது. ஓட்டு எண்ணிக்கை முடிந்த நிலையில், மூன்றரை லட்சம் ஓட்டுக்கள் வித்தியாசத்தில் வெற்றி பெற்ற துரைவைகோ, செய்தியாளர்களுக்கு அளித்த பேட்டியில் 3லட்சத்து 13 ஆயிரத்து இரண்டு ஓட்டுக்கள் வித்தியாசத்தில் வெற்றியை பெற்றுத் தந்த ஜனநாயகத்தின் இறுதி எஜமான்களான திருச்சி தொகுதி மக்களுக்கு மனமார்ந்த நன்றி.

மகளிர் உரிமைத் திட்டம், ஏழை எளிய மாணவ, மாணவியருக்கு கல்லுாரி படிப்புக்கு மாதம் 1,000 ரூபாய், தமிழ்ப் புதல்வன் திட்டம், மகளிர்க்கு கட்டணமில்லா பஸ் பயணத்திட்டம், மக்களை தேடி மருத்துவம், இல்லம் தேடி கல்வி போன்ற ஏழை, எளியோருக்கான திட்டங்களை தந்த தமிழக முதல்வர் ஸ்டாலின் நல்லாட்சிக்கு சான்று தான் இந்த வெற்றி. தந்தையிடம் போனில் பேசிய போது அப்பா வாழ்த்துங்கள் என்று கூறினேன். நான் தான் உனக்கு வாழ்த்து சொல்ல வேண்டும் என கூறினார். நான் எனக்காக போட்டியிடவில்லை. உங்களுக்காக, கட்சிக்காக, கட்சித் தோழர்களுக்காக போட்டியிட்டேன். நீங்கள் கேட்ட வெற்றியை பெற்றுக் கொடுத்துள்ளேன் என்று பேசிய போது, துரைவைகோ கண்கலங்கினார்.