எடப்பாடி பழனிசாமி பிறந்தநாள்

அ.தி.மு.க. பொதுச்செயலாளர் எடப்பாடி பழனிசாமி 70-வது பிறந்த நாள் விழாவை முன்னிட்டு தமிழ்நாடு முழுவதும் அ.தி.மு.க.வினர் இன்று கொண்டாடி வருகின்றனர். ஏழை, எளியோருக்கு நல உதவிகள், கோவில்களில் சிறப்பு வழிபாடு செய்தனர். சேலம் மாநகர் மாவட்ட அ.தி.மு.க. சார்பில் ஜாகீர்அம்மாபாளையம் ஆஞ்சநேயர் கோவிலில் இன்று காலை 9 மணி அளவில் சிறப்பு பூஜை நடந்தது. இந்த பூஜையில் அ.தி.மு.க. நிர்வாகிகள், தொண்டர்கள், சார்பு அணியினர், பொதுமக்கள் ஏராளமானவர்கள் கலந்து கொண்டனர். தொடர்ந்து எடப்பாடி பழனிசாமி பெயரில் சிறப்பு அர்ச்சனையும், அவர் மீண்டும் முதல்-அமைச்சராக வேண்டியும் சிறப்பு பூஜை நடத்தப்பட்டது. மேலும் சுமார் 1,000 பேருக்கு அன்னதானம் வழங்கப்பட்டது. தொடர்ந்து இன்று மாலை 6 மணிக்கு சேலம் மாநகர் மாவட்ட அ.தி.மு.க. சார்பில் சேலம் கோட்டை மாரியம்மன் கோவிலில் சிறப்பு பூஜை நடக்கிறது. தொடர்ந்து எடப்பாடி பழனிசாமியின் பெயரில் சிறப்பு அர்ச்சனையும், அவர் மீண்டும் முதல்-அமைச்சராக வேண்டி தங்கத்தேர் இழுத்து சிறப்பு வழிபாடும் நடக்கிறது. கோவிலில் சுமார் 2,000 பேருக்கு அன்னதானம் வழங்கப்படுகிறது.