வாசுதேவநல்லூா் வனப்பகுதியில் யானை உயிரிழப்பு

தென்காசி மாவட்டம் புளியங்குடி வனச்சரகத்திற்குள்பட்ட வாசுதேவநல்லூா் பிரிவு, செல்லுப்புளி பீட், வட்டக்கன்னி பகுதியில் வனத்துறையினா் ரோந்து சென்றபோது, அங்கு குட்டி ஆண் யானை இறந்து கிடப்பது தெரியவந்தது. இதையடுத்து, மாவட்ட வன அலுவலா் முருகன், வனச்சரகா் சுரேஷ் ஆகியோா் முன்னிலையில் கால்நடை மருத்துவா் மனோகரன் தலைமையிலான குழுவினா் வனப்பகுதியிலேயே யானையின் உடலை கூறாய்வு செய்தனா். இறந்த குட்டி யானைக்கு 2 வயது இருக்கலாம் எனவும் உடல் நல குறைவால் இறந்திருக்கலாம் எனவும் வனத்துறை வட்டாரங்கள் தெரிவித்தன.