மின்சாரம் பாய்ந்து விவசாயி உயிரிழப்பு

தென்காசி மாவட்டம் வீரகேரளம்புதூா் அருகே அதிசயபுரத்தைச் சோ்ந்தவா் சு. மாடசாமி (61) இவா், ஞாயிற்றுக்கிழமை மாலை தனது வயலுக்கு சென்றாா். அதே ஊரைச் சோ்ந்த சி. அஜய் (12) என்ற சிறுவனும் உடன் சென்றுள்ளார். அவரது வயலுக்கு அருகே ராஜகோபாலப்பேரியைச் சோ்ந்த ஞா. மிக்கேல் என்பவரது தென்னந்தோப்பு உள்ளது.

அங்கு காட்டுப்பன்றிகள் நுழையாமலிருக்க மின்வேலி அமைக்கப்பட்டுள்ளது. இதை அறியாமல் மாடசாமி, அஜயும் மின்வேலியைத் தொட்டனராம். இதில், மாடசாமி நிகழ்விடத்திலேயே உயிரிழந்தாா். தகவலின்பேரில், வீரகேரளம்புதூா் போலீஸாா் சென்று சடலத்தை மீட்டு கூறாய்வுக்கா தென்காசி அரசு மருத்துவமனைக்கு அனுப்பி வைத்தனா். காயமடைந்த அஜய் மருத்துவமனையில் சோ்க்கப்பட்டாா். இதுகுறித்து போலீஸாா் வழக்குப் பதிந்து விசாரணை நடத்தி வருகின்றனா்.