கார் மோதிய விபத்தில் விவசாயி பலி

விழுப்புரம் அருகே மரத்தில் கார் மோதிய விபத்தில் விவசாயி சம்பவ இடத்திலேயே பலியானார். கடலூர் மாவட்டம், அன்னவள்ளி கிராமத்தை சேர்ந்தவர் சுப்ராயன் மகன் வீராசாமி(34). இவர், தனது மனைவி உஷா(32); மற்றும் உறவினர்களுடன் வெளியூர் சென்றுவிட்டு தனது காரில் நேற்று முன்தினம் மாலை செஞ்சியிலிருந்து விழுப்புரம் நோக்கி வந்தனர். அப்போது விழுப்புரம் அடுத்த முத்தியால்பேட்டை பகுதியில் வந்தபோது திடீரென கார் கட்டுப்பாட்டை இழந்து இடதுபுறம் சாலையோரம் உள்ள புளிய மரத்தின் மீது மோதி விபத்துக்குள்ளானது. இந்த விபத்தில் வீராசாமி, உஷா, இவரது மகன்கள் யஷ்வந்த்(8), தஷ்வந்த்(8) உறவினர்கள் மணிகண்டன்(22), சிலம்பரசன்(24), வீராசாமியின் சித்தப்பா சுப்ரமணியன்(52) ஆகியோர் காயமடைந்தனர். இவர்கள் முண்டியம்பாக்கம் அரசு மருத்துவக்கல்லூரி மருத்துவமனையில் சேர்க்கப்பட்டனர். இதில் சிகிச்சை பலனின்றி சுப்ரமணியன் இறந்தார். இந்த விபத்து குறித்த புகாரின் பேரில் விழுப்புரம் தாலுகா போலீசார் வீராசாமி மீது வழக்கு பதிந்து விசாரணை நடத்தி வருகின்றனர்.