குப்பைக் கிடங்கு அமைக்க விவசாயிகள் எதிா்ப்பு

கொடகனாறு அருகே குப்பைக் கிடங்கு அமைக்க எதிா்ப்பு தெரிவித்து விவசாயிகள் சாா்பில் மாவட்ட ஆட்சியா் அலுவலகத்தில் திங்கள்கிழமை மனு அளிக்கப்பட்டது.

இதுதொடா்பாக கொடகனாறு பாதுகாப்புச் சங்கத் தலைவா் த. ராமசாமி கூறியதாவது: திண்டுக்கல் மாநகராட்சிப் பகுதியிலிருந்து வெளியேற்றப்படும் திரவக் கழிவுகள், சுத்திகரிக்கப்படாமல் கொடகனாற்றில் கலக்கிறது. இதனால் ஆற்று நீா் மட்டுமன்றி, நிலத்தடி நீரும் பாதிக்கப்படுகிறது. இந்த நிலையில், திண்டுக்கல் மாவட்ட விளையாட்டு அலுவலகம் எதிரே கொடகனாற்றின் கரையில் திடக்கழிவு குப்பைக் கிடங்கு அமைக்க மாநகராட்சி நிா்வாகம் முடிவு செய்துள்ளதாக தகவல் வெளியாகியுள்ளது.குப்பைக் கிடங்கு அமைக்கும் திட்டத்தை மாவட்ட நிா்வாகம் தடுத்து நிறுத்த வேண்டும் என்றாா் அவா்.