கூடுவாஞ்சேரியில் பழுதான மின்மாற்றி சீரமைப்பு

நந்திவரம் - கூடுவாஞ்சேரி நகராட்சி, சீனிவாசபுரம் ஜி. எஸ். டி. , சாலையில் மின்மாற்றி உள்ளது. இந்த மின்மாற்றியின் வாயிலாக, சீனிவாசபுரம், கே. கே. நகர் போன்ற பகுதிகளுக்கு மின் வினியோகம் செய்யப்பட்டு வருகிறது. இந்நிலையில் இந்த மின்மாற்றியின் அருகில் செடி, கொடிகள் அடர்ந்து, அது மின் கம்பியில் உரசி அடிக்கடி மின் தடை ஏற்பட்டது. இது குறித்து, அப்பகுதிவாசிகள் அளித்த புகாரையடுத்து, கூடுவாஞ்சேரி உதவி செயற்பொறியாளர் உத்தரவின்படி, மின்வாரிய பணியாளர்கள் மின்மாற்றியை சீரமைக்கும் பணியில், நேற்று ஈடுபட்டனர். அப்போது, மின்மாற்றியை சுற்றி, தேங்கி இருந்த குப்பை கழிவுகள், செடி, கொடிகளை அகற்றி, பழுதான மின் கம்பியை மாற்றி, சீரான மின் வினியோகத்திற்கு வழிவகை செய்தனர். நேற்று நடைபெற்ற பராமரிப்பு பணியின் காரணமாக, ஒரு மணி நேரத்திற்கு அப்பகுதியில் மின் நிறுத்தம் செய்யப்பட்டது. பணி முடிந்ததும், சீரான மின் வினியோகம் வழங்கப்பட்டது.