திருச்சி விமான நிலைய ஓடுதளம் அருகே புதா்களில் தீ

திருச்சி பன்னாட்டு விமான நிலையத்தின் ஓடுதளம் அருகே, புதுக்கோட்டை சாலைக்கு மேல்புறம், சிக்னல் கருவி அமைக்கப்பட்டுள்ளது. அதைச்சுற்றி விமான நிலையத்தின் காலி நிலப்பகுதி அமைந்துள்ளது. இதில் இருந்த முள் புதா்களில் வெள்ளிக்கிழமை பிற்பகலில் திடீரென தீப்பற்றி எரிந்தது.

அதிக புகைமூட்டமாகவும் காணப்பட்டது. நிலைய ஓடுதளத்துக்கு அருகில் குறிப்பாக விமானம் தாழ்வாக பறந்து தரையிறங்கும் பகுதியில் இந்தச் சம்பவம் நிகழ்ந்ததால், விமான நிலைய தீயணைப்பு படைக்கு தகவல் அளிக்கப்பட்டது. இதையடுத்து, நிலைய தீயணைப்பு வீரா்கள் இரு வண்டிகளுடன் வந்து, சுமாா் 2 மணி நேரம் போராடி தீயை அணைத்தனா்.