சேலம் சிறைக்கு அழைத்து வரப்பட்ட சென்னை கைதியிடம் கஞ்சா பறிமுதல்

சென்னையை சேர்ந்தவர் விஜய் (வயது 32). இவர் வழக்கு ஒன்றில் கைது செய்யப்பட்டு சென்னை புழல் சிறையில் அடைக்கப்பட்டுள்ளார். இதனிடையே வேறு ஒரு வழக்கு தொடர்பாக தாராபுரம் கோர்ட்டில் ஆஜர்படுத்துவதற்காக கடந்த 23-ந் தேதி போலீஸ் பாதுகாப்புடன் விஜய் அழைத்து வரப்பட்டார். சேலம் வந்த போது இரவாகி விட்டதால் சேலம் மத்திய சிறையில் அவரை போலீசார் அடைத்தனர்.

இதையடுத்து நேற்று முன்தினம் விஜயை போலீசார் தாராபுரம் கோர்ட்டில் ஆஜர்படுத்தினர். அன்று மாலை அவரை மீண்டும் சேலம் சிறையில் அடைப்பதற்காக போலீசார் அழைத்து வந்தனர். அப்போது அவரது நடையில் போலீசாருக்கு சந்தேகம் ஏற்பட்டது. இதனால் அவரை சிறையின் நுழைவு வாயில் அருகே உள்ள அறைக்கு அழைத்து சென்று போலீசார் சோதனை செய்தனர். அப்போது அவரிடம் கஞ்சா பொட்டலம் ஒன்று இருந்தது கண்டுபிடிக்கப்பட்டது. இதையடுத்து அவரிடம் இருந்து கஞ்சாவை போலீசார் பறிமுதல் செய்தனர். தொடர்ந்து அவருக்கு கஞ்சா பொட்டலம் வழங்கியது யார்? என்பது குறித்து சிறை அதிகாரிகள் தொடர்ந்து விசாரணை நடத்தி வருகின்றனர்.