ஆழ்வார்திருநகரி கோவிலில் கருடசேவை :திரளான பக்தர்கள் தரிசனம்

தூத்துக்குடி மாவட்டத்தில் அமைந்துள்ள நவதிருப்பதி கோவில்களில் ஒன்பதாவது ஸ்தலமாக ஆழ்வார்திருநகரி ஆதிநாதர் ஆழ்வார் கோவில் அமைந்துள்ளது. இந்த கோவிலில் ஆண்டுதோறும் பங்குனி பிரம்மோற்சவ திருவிழா சிறப்பாக நடைபெறும். இதன்படி இந்தாண்டிற்கான பங்குனி பிரம்மோற்சவ திருவிழா கடந்த 16-ந் தேதி கொடியேற்றத்துடன் தொடங்கியது.

திருவிழா காலங்களில் தினமும் காலை, மாலையில் பெருமாள் தாயார்களுடன் திருவீதி உலா நடைபெற்றது. 5-ம் திருநாளான நேற்று இரவு 7 மணி அளவில் கருடசேவை நடந்தது. கருடசேவை நிகழ்ச்சியை முன்னிட்டு காலையில் கோவில் நடை திறக்கப்பட்டு விஸ்வரூப தரிசனம் நடந்தது. தொடர்ந்து திருமஞ்சனம், நித்தியல் கோஷ்டி, தீர்த்தம் சடாரி வழங்கப்பட்டது.

இரவு 7 மணி அளவில் கருட வாகனத்தில் பொலிந்து நின்ற பிரானும், அன்ன வாகனத்தில் நம்மாழ்வாரும் எழுந்தருளி பக்தர்களுக்கு காட்சி கொடுத்தனர். நிகழ்ச்சியில் திரளான பக்தர்கள் கலந்து கொண்டு பெருமாளை தரிசனம் செய்தனர். திருவிழாவின் முக்கிய நிகழ்வான தேரோட்டம் வருகின்ற 24-ந் தேதி நடைபெறுகிறது. 25-ந் தேதி பங்குனி உத்திரத்தில் தாமிரபரணி நதியில் தீர்த்தவாரி நடைபெறுகிறது. விழாவிற்கான ஏற்பாடுகளை கோவில் செயல் அலுவலர் மற்றும் ஊர்மக்கள் செய்து வருகின்றனர்.