முன்னாள் ஆயர் ஆம்புலன்சில் சென்று வாக்களிப்பு

தஞ்சாவூரில் மறை மாவட்ட முன்னாள் ஆயர் உடல் நலக் குறைவு நிலவிய நிலையிலும் வெள்ளிக்கிழமை காலை வாக்குச் சாவடிக்கு சென்று வாக்களித்தார். தஞ்சாவூர் மறை மாவட்ட ஆயராக எம். தேவதாஸ் ஆம்புரோஸ் அடிகளார் (77) 25 ஆண்டுகளாகப் பணியாற்றி கடந்த ஆண்டு ஓய்வு பெற்றார்.

அருளானந்த நகரில் உள்ள ஓய்வு இல்லத்தில் வசித்து வரும் அடிகளார் உடல்நலக் குறைவு காரணமாக இல்லத்திலேயே சிகிச்சை பெற்று வருகிறார். இந்நிலையில் ஜனநாயக கடமையை ஆற்றுவதற்காக அடிகளார், ஆம்புலன்ஸ் வாகனத்தில் புதுக்கோட்டை சாலையில் உள்ள கில்டு ஆப் சர்வீஸ் மையத்தில் அமைக்கப்பட்டுள்ள வாக்குச் சாவடிக்கு வெள்ளிக்கிழமை காலை சென்றார். பின்னர் சக்கர நாற்காலியில் அடிகளார் அமர்த்தப்பட்டு வாக்குப் பதிவு மையத்துக்கு அழைத்துச் செல்லப்பட்டார்.

அங்கு வாக்குப் பதிவு செய்த அவர் பின்னர் ஆம்புலன்ஸ் வாகனத்தில் மீண்டும் தனியார் மருத்துவமனைக்கு அழைத்துச் செல்லப்பட்டார்.