வீடு சரிந்து விழுந்தது.... பாதிக்கப்பட்டவருக்கு எம்எல்ஏ நிதியுதவி 

தஞ்சாவூர் மாவட்டம் பேராவூரணி சட்டமன்ற தொகுதிக்குட்பட்ட, சேதுபாவாசத்திரம் ஒன்றியம், செல்லப்பிள்ளையார் கோவில் பகுதியில் வசித்து வருபவர் அ.நாகராஜன், தேநீர் கடை தொழிலாளி. இவருக்கு மனைவியும், ஆண், பெண் என இரு குழந்தைகளும் உள்ளனர். பேராவூரணி பகுதியில் கடந்த சில தினங்களாக விட்டு விட்டு மழை பெய்து வருகிறது. இந்நிலையில் திங்கள்கிழமை காலை நாகராஜன், அவரது மனைவி பேராவூரணி சென்று விட்டனர். பிள்ளைகள் பள்ளிக் கூடம் சென்று விட்டனர்.

இந்நிலையில், திங்கள்கிழமை காலை சுமார் 10 மணியளவில் இவரது ஓட்டு வீடு முற்றிலுமாக சரிந்து விழுந்தது. நல்வாய்ப்பாக வீட்டில் எவரும் இல்லாததால் அசம்பாவிதம் தவிர்க்கப்பட்டது. இதுகுறித்து தகவல் அறிந்து சட்டப்பேரவை உறுப்பினர் நா.அசோக்குமார் நேரில் சென்று பாதிக்கப்பட்ட குடும்பத்தினருக்கு ஆறுதல் கூறி நிதிஉதவி வழங்கினார். அப்போது சேதுபாவாசத்திரம் தெற்கு திமுக ஒன்றியச் செயலாளர் ரவிச்சந்திரன், சுரேஷ் மற்றும் கட்சியினர் உடனிருந்தனர்.