சட்டவிரோதமாக மது விற்பனை செய்தவர் கைது - 438 மது பாட்டில் பறிமுதல்

கன்னியாகுமரி மாவட்டம் தக்கலை போலீஸ் சப்-இன்ஸ்பெக்டர் சாமுவேல் தலைமையில் போலீசார் ரோந்து பணியில் ஈடுபட்டனர். அழகியமண்டபம் பகுதியில் அவர்கள் சென்றபோது சந்தேகத்திற்கிடமாக ஒருவர் நின்றார். அவரை போலீசார் பிடித்து விசாரணை நடத்தினர். அவர் முன்னுக்குப் பின் முரணாக பேசியதால் அவர் வைத்திருந்த சாக்குப்பையை சோதனை செய்தனர்.அதில் திருட்டுத்தனமாக விற்பதற்காக மது பாட்டில்கள் பதுக்கி வைத்திருந்தது தெரிய வந்தது. அவரிடமிருந்து 438 மது பாட்டில்கள் பறிமுதல் செய்யப்பட்டது. விசாரணையில் அவர் ஆற்றுகோணம் பகுதியைச் சேர்ந்த ஸ்டாலின் ஜோஸ் (42) என தெரியவந்தது. இதைத்தொடர்ந்து அவரை கைது செய்த போலீசார் வழக்கு பதிவு செய்து விசாரணை நடத்தி வருகின்றனர்.