தம்மம்பட்டியில் ஜல்லிக்கட்டுப் போட்டி !

கெங்கவல்லி:சேலம் மாவட்டம் கெங்கவல்லி வட்டம் தம்மம்பட்டியில் ஞாயிற்றுக்கிழமை (பிப். 25) ஜல்லிக்கட்டுப் போட்டி நடைபெற உள்ளது. இதற்கான ஏற்பாடுகளை நகர திமுக பொறுப்பாளர் சண்முகம் தலைமையில் விரிவான ஏற்பாடுகளை விழாக் குழுவினர் செய்துள்ளனர். மாவட்ட ஆட்சியர் இரா. பிருந்தாதேவி வழங்கிய ஆலோசனைகள் நடைமுறைப்படுத்தப்பட்டுள்ளது. ஜல்லிக்கட்டுப் போட்டியில் திருச்சி, லால்குடி, மதுரை, அலங்காநல்லூர், கரூர், நாமக்கல், பெரம்பலூர், கள்ளக்குறிச்சி, துறையூர், முசிறி, ராசிபுரம், நாமகிரிப்பேட்டை, சின்னசேலம் உள்ளிட்ட 100க்கும் மேற்பட்ட ஊர்களிலிருந்து சுமார் 700 காளைகள் பங்கேற்க உள்ளன. மாடுபிடி வீரர்கள் 320க்கும் மேற்பட்டோர் பதிவு செய்துள்ளனர். விழாக் குழுவினர் சார்பில் மாடுபிடிவீரர்களுக்கும், காளைகளுக்கும் பரிசுகள் வழங்க உள்ளனர். பாதுகாப்பு ஏற்பாடுகளை மாவட்ட காவல் கண்காணிப்பாளர் ஏ. கே. அருண்கபிலன் தலைமையில், கூடுதல் எஸ். பி. கண்ணன் மேற்பார்வையில் டி. எஸ். பிக்கள் 4 பேர், காவல் ஆய்வாளர்கள் 20 பேர் உள்பட 500 போலீஸார் பாதுகாப்புப் பணியில் ஈடுபட உள்ளனர்.