மூதாட்டியிடம் நகை பறிப்பு - 3 வாலிபர்கள் கைது

சேலம் மாவட்டம் எடப்பாடி அருகே வெள்ளரி வெள்ளி காஞ்சியூர் பகுதியை சேர்ந்த தூங்கான் மனைவி சின்னபொண்ணு (70). இவர் கடந்த 5-ந் தேதி அப்பகுதியில் உள்ள செல்லாண்டி அம்மன் கோவில் திருவிழாவிற்கு சென்றார். பின்னர் மாலையில் தனியாக வீட்டுக்கு சென்று கொண்டிருந்தார். அப்போது காஞ்சியூர் அருகே நடந்து சென்றபோது மோட்டார் சைக்கிளில் வந்த 3 பேர் மூதாட்டியை தாக்கிவிட்டு அவர் கழுத்தில் அணிந்திருந்த 4½ பவுன் நகையை பறித்து சென்றனர்.

இதுகுறித்து சின்னப்பொண்ணு அளித்த புகாரின்பேரில் பூலாம்பட்டி போலீசார் வழக்குப்பதிவு செய்து விசாரணை நடத்தினர். அதில் மூதாட்டியிடம் நகையை பறித்தது மேட்டூர் அருகே குள்ள வீரம்பட்டியை சேர்ந்த சுப்ரமணி மகன் அஜய் (24), முத்து மகன் மாரியப்பன் (30) மற்றும் அதே பகுதியை சேர்ந்த கோவிந்தன் மகன் ரவி (23) என்பது தெரியவந்தது. இதனையடுத்து அவர்கள் 3 பேரையும் கைது செய்தனர். அவர்களிடம் இருந்து நகையை மீட்ட போலீசார் மோட்டார் சைக்கிளை பறிமுதல் செய்தனர்.