வெறும் காலில் ஓடிய பெண்களுக்கு ஷூ வாங்கி கொடுத்த கனிமொழி!

திமுக தலைவரும்,தமிழ்நாடு முதலமைச்சருமான மு.க.ஸ்டாலின் பிறந்த நாளை முன்னிட்டு, திருச்செந்தூரில் தூத்துக்குடி தெற்கு மாவட்ட திமுக சார்பில் ஆண், பெண் இரு பாலரும் பங்கேற்ற மாநில அளவிலான மாபெரும் மாரத்தான் போட்டி நடைபெற்றது. திருச்செந்தூர் சட்டமன்ற உறுப்பினர் அலுவலகம் முன் திமுக துணைப் பொதுச் செயலாளர் கனிமொழி கருணாநிதி எம்.பி போட்டியை கொடியசைத்து துவக்கி வைத்தார். தூத்துக்குடி தெற்கு மாவட்ட திமுக செயலாளரும், மீன்வளம், மீனவர் நலன் மற்றும் கால்நடை பராமரிப்புத்துறை அமைச்சருமான அனிதா ஆா்.ராதாகிருஷ்ணன் தலைமையில் நடைபெற்ற இந்நிகழ்ச்சியில் மாரத்தான் போட்டியில் வெற்றி பெற்ற வீரர்களுக்குக் கனிமொழி எம்.பி ரொக்க பரிசு வழங்கி வாழ்த்தினர். மேலும், பெண்களுக்கான போட்டியில், வெறும் காலில் ஓடியவர்களுக்குக் கனிமொழி கருணாநிதி எம்.பி தனது சொந்த செலவில் ஷூ வாங்கி கொடுத்தார்.