முதியவர் மர்ம மரணம் - போலீசார் விசாரணை

திருப்பூர் மாவட்டம், பாப்பநாயக்கன்பாளையம் பகுதியை சேர்ந்தவர் பழனிச்சாமி, 55. இவர் சில மாதங்கள் முன்பு குமாரபாளையம் சென்று பிழைத்து கொள்கிறேன் என குடும்பத்தார் வசம் சொல்லிவிட்டு வந்துள்ளார். இங்கு இவரது மகள் நளினி வீட்டிற்கு அவ்வப்போது சென்று வந்துள்ளார். நேற்றுமுன்தினம் பகல் 12:00 மணியளவில், தேசிய நெடுஞ்சாலையில் உள்ள காவிரி ஆற்றுப்பாலத்தின் கீழே இவர் இறந்து கிடப்பதாக, இவரது சட்டைப்பையில் எழுதி வைக்கப்பட்ட சீட்டினை பார்த்த நபர் ஒருவர், நளினிக்கு தகவல் சொன்னார். திருப்பூரில் வசிக்கும் அண்ணன் மணிகண்டனுக்கு தகவல் சொல்ல, அவரது குடும்பத்தார் நேரில் வந்தனர். மர்மமான முறையில் இறந்தது குறித்து நடவடிக்கை எடுக்குமாறு குமாரபாளையம் போலீசில், மணிகண்டன் புகார் மனு கொடுத்துள்ளார். இது குறித்து குமாரபாளையம் போலீசார் விசாரணை செய்து வருகின்றனர்.