குமரி பகவதி அம்மன் வைகாசி விசாக விழா நாளை துவக்கம்

கன்னியாகுமரி அருள்மிகு பகவதியம்மன் கோயிலில் 10 நாள் வைகாசி விசாகப் பெருந்திருவிழா செவ்வாய்க்கிழமை நாளை (மே 14) கொடியேற்றத்துடன் தொடங்குகிறது.

முதல்நாள் அதிகாலையில் கோயில் நடை திறக்கப்பட்டு 5 மணிக்கு சிறப்பு அபிஷேகம், 5.30 மணிக்கு கணபதி ஹோமம், காலை 7.30 மணிக்கு மேல் காலை 8.30 மணிக்குள் திருக்கொடியேற்றம் நடைபெறும். பின்னா், காலை 10 மணிக்கு சிறப்பு அபிஷேகம், நண்பகல் 12 மணிக்கு அன்னதானம், இரவு 7 மணிக்கு சமய உரை, 8 மணிக்கு பக்தி பஜனை, 9 மணிக்கு தேவி பூப்பந்தல் வாகனத்தில் திருவீதி உலா வருதல் ஆகிய நிகழ்வுகள் நடைபெறும். விழா நாள்களில் சிறப்பு அபிஷேகம், அம்மன் பல்வேறு வாகனங்களில் திருவீதி உலா, அன்னதானம், சமய உரை, கலை நிகழ்ச்சிகள் ஆகியவை நடைபெறும்.

9ஆம் திருநாளான மே 22-ல் காலை 9.30 மணிக்கு மேல் காலை 10.30 மணிக்குள் அம்பாள் தேருக்கு எழுந்தருளியதும் தேரோட்டம் நடைபெறும். தோ்நிலைக்கு வந்ததும் கஞ்சி தானம் நடைபெறும். இரவு 9 மணிக்கு தேவி வெள்ளிக்கலைமான் வாகனத்தில் திருவீதி உலாவருதல் நடைபெறும். 10ஆம் திருநாளான மே 23- ல் அதிகாலை 5.30 மணிக்கு முக்கடல் சங்கமத்தில் அம்மனுக்கு ஆறாட்டு, இரவு 9 மணிக்கு அம்மன் தெப்பத்தில் வலம் வரும் தெப்பத்திருவிழா நடைபெறும். இதில் ஏராளமான பக்தா்கள் கலந்து கொள்கின்றனா். விழாவுக்கான ஏற்பாடுகளை குமரி மாவட்ட இந்து சமய அறநிலையத்துறை மற்றும் திருக்கோயில் நிா்வாகத்தினா் செய்து வருகின்றனா்.